Torsdagsquiz 4 - 2.desember 2021

Under følgjer resultat, spørsmål og svar.

Sesongens fjerde quiz skulle bli ein kamp mellom 13 trivelege lag. Mulig nokre skeptiske sjeler stod over grunna smitteutviklinga denne gong. Snittscoren enda på dryge 52 poeng. Tre glupe lag kom seg over 60 poeng.

Det såg ut til å vera greie spørsmål på førstearket. Tolv av laga scora tosifra antal poeng. Største utfordringa var truleg handballspørsmåla, samt Kim Frieles eigentlege fornamn. Best av alle var Har Det På Tunga med skarpe 15 poeng. Snittet var på 11,4. Elles er det verdt å nemna forslaga på den nye Stortingspresidenten som IKKJE gav poeng: Ashawahri, Hashikari, Gulsjari og Gulani.

Musikken skulle ein tru kunne gi høge scorar denne gong. Dei fire låtane var nemlig henta frå lista over bestselgande album gjennom tidene. Heile ti lag scora sju eller åtte poeng, og berre FIA HOFA klagde over at det var "aaaaalt for vanskeleg". Ein kan jo undrast kva ein skal finna på av musikkquiz som kan tilfredsstilla deira sarte øyrer då. Haha. Underhaldningsbiten skulle også vere overkomeleg denne gong. For HBO vart det nok FOR enkelt. Dei scora full pott og 16 poeng. Elles veldig mykje bra og 11 av 13 lag med 10 poeng eller meir. Snittet enda på høge 11,8.

Halvvegs var det tre lag i tet med 27 poeng: Quizedillas, HBO og Har Det På Tunga.

Så skulle det bera rett utfor og i nedoverbakke for fleire av laga. Både tredjearket med historie og geografi, samt den middels vanskelege blandinga på sistearket skapte nok grå hår denne gong. Begge arka hadde snitt som enda på under ti poeng (hhv 9,8 og 8,6), så her må nok fleire av laga leggja seg i selen og lesa seg betre opp framover (QM tek sjølvsagt aldri sjølvkritikk på FOR vanskelege spørsmål). Best på historie/geografi var HBO og LAMP AS med 15 poeng. Veldig bra! På Lett Blanding var nok ein gong HBO vassast med sine 12 poeng. Kudos også til QF, HDPT, Dei Hjelpelause og Fonna i Krise som alle klarte å pressa ut 11 poeng. Spørsmåla laga sleit mest med var: 3.9: Leipzig / Dresden. 3.10c: Skåne - Scania. 4.8: Røsslyng / Bergfrue. 4.10b: Sindre Aam - Vassendgutane. Elles var det verdt å merka seg at heile åtte lag IKKJE visste at eit maraton er 42.195 meter. Overraskande.

Biletearket gav oss denne gong ein snittscore på 10,5. Altså omtrent som forventa. Beste score var 13 rette, noko HBO, LAMP AS og Dei Hjelpelause stod for. Vanskelegaste bilete (antal lag med rett i parantes): 1. Erik Valnes (3) og 2. Henny Reistad (3). Elles såg det ut til at dei fleste gleda seg over at Zara Larsson endeleg var tilbake på biletearket. Kun FIA HOFA svara blankt og fekk feil på denne etter kvart kjente gjengangaren. Men så veit me jo det at dei ikkje får spela musikk på sjukehuset, så dei får heller vera unnskyldt. Hehe.

Totalt sett var det ingenting å gjera med suverene HBO denne kvelden. Dei vann med heile sju poeng ned til neste lag. Sterkt! QF og HDPT enda begge på 60 poeng, med QF som best på biletearket og dermed sølvplass.

Vinnar av to helgepass til 100 Dagar i februar 2022: Quiztorn

Quizvert var Jon, med Geir og Alena i baren.

Quiz nummer fem, og årets siste, vert torsdag 16.desember.

Resultat quiz 4 av 13 haust 2021 / vår 2022 - 2.desember:
(Trykk på bileta for større visning)

Samanlagt:

Alle spørsmål med fasit:

Torsdagsquiz 3 - 18.november 2021

 

Under følgjer resultat, spørsmål og svar.

For tredje gong denne hausten stilte 15 joviale lag til quiz på Arena. Nokre nye og nokre forfall frå faste lag. Snittscoren denne gong enda på 57,5 poeng. Heile seks lag kom seg over 60 poeng.

Nok ein gong denne hausten var det den bråkjekke gjengen i Quizteleg Fjolleparti som drog det lengste strået og vann quizen. Denne gong utkonkurrerte dei både Dei Hjelpelause og Lex Lodney med minst muleg margin: Flest rette bilete etter lik totalscore (69p). Til lukka med pallplass til dei tre smarte laga!

Vinnar av konsertbillett til Valentourettes på Arena laurdag 20.november: Happy Quizmas.

Elles seier ikkje rapporten fra den tristamento quizverten noko meir. Men sidan snøen truleg er like om hjørna denne hausten, gjer me difor eit lite dykk i arkivet frå det glade 80-tal:

Quizvert var banankongen Sverre, med Geir og Alena i baren.

Quiz nummer fire vert om snaue to veker: torsdag 2.desember.

Resultat quiz 3 av 13 haust 2021 / vår 2022 - 18.november:
(Trykk på bileta for større visning)

Samanlagt:

Alle spørsmål med fasit:

Torsdagsquiz 2 - 4.november 2021

Under følgjer resultat, spørsmål og svar.

Nok ein gong stilte 15 snedne lag og snittscoren var denne gong på litt beskjedne 52,8 poeng. Kanskje litt som forventa. Hehe. Fire skarpe lag kom seg over 60 poeng denne gong.

Det var med litt spaning og ein smule nervøsitet quizverten returnerte til manesjen denne kvelden. Med over 600 dagar brakk, utan quiz og utan mikrofoni, kunne det jo fort gå til helvete. Korleis var det no igjen det fungerte? Korleis ville det bli å gå i skjorte og langbukse igjen?

Det er løye med det når det fyrst brakar laus. Dei gamle rutinane sat ikkje så verst. Som å sykla. Papir og pennar vart delt ut. Gåvekort signert. Lettbeint musikk satt på. Og lokalet fyltes sakte men sikkert opp. Geir og Alena i humør. God trafikk i baren. Mat og drikke. Klingande virtuell mynt i kassen. Joda, dette borga for nok ein god quizkveld.

Nytt denne hausten er jo at quizen KUN vert annakvar veke. Det vil også sei at me som quizvertar har litt meir nyhende å spela på når me skal komponera dei aktuelle spørsmåla på fyrstearket. Om det kanskje var litt for lett for 14 dagar sidan, var det kanskje litt for vrient denne gong. I allefall for somme av laga. Halvparten av laga plasserte seg på rundt halvparten rette svar, medan det som alltid er lag som imponerar med god hått. Best var Dei Sporadiske med sine 14 rette. Deira einaste feil var, som dei aller fleste, bom på COP26, samt antal millionar innsamla i TV-aksjonen. Det er óg på sin plass å gi kudos til det unge, friske og nye laget Quizlis 1.5 som saman med dei tunge quizdyra QF og BJoP imponerte med 13 poeng. Snittet enda på snaue 10 poeng på dei aktuelle spørsmåla. Det får vere greit.

Det var knytt litt spaning til korleis quizarane ville reagere på litt hardrock på musikkquizen. Dette er ein sjanger det historisk sett har vert alt for lite av. Men all bekymring om at dette ville skape furore, bunnlaus fortviling og raseri kan tydlegvis skrotast. Dette kunne jo nesten alle! Men Maiden er jo pensum, så det skulle gjerne berre mangla. Ti lag hadde både rett band og låt, medan tre lag hadde rett band. Videre var det storeslem på Olav Stedje (som spelar på Arena i kveld), godkjent på Morten Abel (her var nok namn på låt ei lita nøtt) og til slutt litt bob-bob på James Bay. Best på musikken var QF og Dei Sporadiske med sju av åtte poeng. Sterkt. Fleire lag var óg gode på underhaldningsdelen, sjølv om det hos nokon var litt rusk både på Halloween, Beethoven og Papaya. Best på andrearket var nemnte lag, QF og DS, med 15 poeng. Snitt: 11,7 poeng.

Det var også disse to laga som hadde tatt teten halvvegs. DS på topp med 29 poeng føre QF med 28. På tredjeplass hadde BJoP lagt seg med greie 25 poeng.

Ark tre handla denne gong om katastrofar og hardtslåande. Men eit snitt på om lag 11 poeng falt dette tydlegvis i smak hos dei fleste. Likevel vart det kanskje litt katastrofe for andre. Fire av laga makta berre 6-8 poeng, og er nok ikkje nøgde med det. Spørsmålet flest lag sleit med var nok det om Wilhelm Gustloff. Fleire sleit også med rett årstal og destinasjon for flyet som forsvann i Asien for sju år sidan. Elles var dei fleste rimelig rå på spørsmåla om boksing. Bra! Beste lag var QF og LAMP AS med 15 poeng.

Siste ark med Lett Blanding blei nok kanskje litt for lett. Snittet enda på nesten 12 poeng. Utanom dei kjekke gutane på Samvirkelaget som kollapsa fullstending med sine 3 poeng, leverte dei aller fleste andre lag meget pluss her. Vanskelegaste spørsmål var dei om Miss World og Rabin. Elles svara fleire lag at kompisen til Elling heiter Bjarne. Dei fekk ikkje poeng. Og Tvedestrand? Kan alle den no? Utanom Jondal er det nok ein av plassane i landet vårt med finast namn. Beste lag var BJoP, HBO, Quizzvazz og Har Det På Tunga. Disse nagla 15 poeng.

Kveldens bileteark skulle visa seg å vere det arket som gav dårlegast snittscore. Med kun 8,7 i snitt var det mange lag som fekk kjørt seg her. Til dømes gjekk vanlegvis sterke HDPT på ein stjernesmell her med berre tre rette fjes. Beste lag hadde 13 rette: BJoP og HBO.

Samanlagt vart det på nytt ein kamp mellom dei fire historisk beste quizlaga på øya dei siste år. Dei Sporadiske måtte ned eit hakk etter bronseplassen for 14 dagar sidan, og enda denne gong på den sure fjerdeplassen. HBO tok seg opp på pallen med sine 64 poeng, men måtte sjå seg slått av både BJoP og QF med tre poeng. Gullduellen var avgjort til QF sin fordel på beste score på enkeltark.

Gutane på Samvirkelaget, som var nett like blide sjølv om dei fekk store problem på enkelte av rundane, kunne til slutt jubla likevel. Dei vann konsertbillettar til Bergen Mandolinorkester i regi av Falturiltu. Denne godbiten går av stabelen på Arena i morgon laurdag 6.november.

Quizvert var Jon, med Geir og Alena i baren.

Quiz nummer tre vert om snaue to veker: torsdag 18.november.

Resultat quiz 2 av 13 haust 2021 / vår 2022 - 4.november:
(Trykk på bileta for større visning)

Samanlagt:

Alle spørsmål med fasit:

Torsdagsquiz 1 - 21.oktober 2021

 

Under følgjer resultat, spørsmål og svar.

15 stilige lag deltok og snittscoren var denne gong på sterke 62,3 poeng. Tre skarpe lag av 15 kom seg over 70 poeng og heile 11 lag over 60 poeng.

Endeleg var det på tide med quiz på Arena og Frugård att! Heile 595 dagar utan quiz er for lenge. Ein skulle tru at det for mange var kjærkoment med quizcomeback, då både Jon, Sverre og Geir har fått nok av henvendingar om når quizen skulle returnera i løpet av det siste halvanna året. Me måtte altså venta heilt til gjenopningssteg 9 (der det igjen er lov å gå på do utan å vaska nevane etterpå) før det vart innafor å starte opp att med quizen. Høhø.

Det var difor gledeleg for quizcrewet at såpass mykje folk møtte opp denne kvelden. Som nemnt stilte 15 lag, noko som er bra. Men det er endo plass til fleire. Ut i frå lagnamna var det mange gjengongarar, men også nokre nye lag. Det likar me.

Timar før oppstarten hadde quizvertane telefonmøte, og det var ei enkel avgjerdsle at sjølve strukturen på quizen skulle vera uforandra sidan me sist møttes på Arena, 5.mars 2020. Altså 80 poeng oppnåeleg, med 16 poeng per ark. Kva er då meir naturleg enn at Sverre sausar i hop 15 poeng på første ark? Haha. Så dersom de ser eit poeng for mykje på førstearket på resultatlista under, er det reknskapsføraren som har gitt alle lag eit bonuspoeng her. Det fortenar de alle. Lat oss sei det var for oppmøtet.

Det ser ut som dei fleste lag kom seg greit gjennom førstearket, med eit snitt på nesten 13 poeng. Litt verre vart det på andrearket med musikk og underholdning. Her må nok nivået opp eit par hakk for fleire av laga dersom de skal vera med å eta kirsebær med dei store. Snitt på dryge 10 poeng. Var det musikken til Geir som nok ein gong var heilt kørka?

Halvvegs leia eit skarpt tospann beståande av LAMP AS og Dei Sporadiske med 28 poeng.

Ark tre handla denne gong om COVID-19 delt på Godt og Dårleg. Dette må ha falt i smak hjå deltakarlaga. Tre lag tok full pott, medan samtlege kom frå det med maksimalt to feil. Imponerande eller rett og slett for enkle spørsmål? Me lyt konkludera med at samtlege lag her var forferdeleg gode.

På Lett Blanding gjorde også dei alle fleste laga det godt. Snittet enda på over 12 poeng. Kudos til QF for full pott her. Det var to poeng betre enn neste lag.

Biletearket gav også gode scorar denne gong. Snittet kom nesten opp i 12 poeng og tre lag prikka inn 15 rette av dei 16 rette svara. Tretten av femten lag hadde minimum 10 rette, så her må nok resterande lag gå i seg sjølv og pugga aktuelle fjes til neste quiz.

Sjølv om ark to var heller begredeleg for laget, var QF såpass gode på resten av arka at det skulle holda til siger i quizcomebacket. Men det var med minst muleg margin. LAMP AS enda på like mange poeng, men måtte sjå seg slått sidan QF henta full pott på fjerdearket om Lett Blanding. Finfin tredjeplass til Dei Sporadiske, berre poenget bak tetduoen.

Om det var Rop Ut Quiz, om nokon vann den, om dei fekk kinobillettar og om noko lag vann konsertbillettar sa rapporten frå quizverten ingen verdas ting om. Sjølv etter purring var det tyst.

Quizvert var Sverre, med Geir og Alena i baren.

Quiz nummer to vert om snaue to veker: torsdag 4.november.

Resultat quiz 1 av 12 haust 2021 / vår 2022 - 21.oktober:
(Trykk på bileta for større visning)

Alle spørsmål med fasit:

(PS: Ver greie å tilgi bloggaren for alle skrivefeila under. Det vert diverre så aldeles for mykje arbeid å retta opp i "kladden" til quizverten som held annakvar quiz)

Her skulle sjølve biletearket vist, men det vart aldri rapportert inn til bloggansvarleg frå kveldens quizvert.